Neste 20 de novembro, a ONU adica o día Mundial da Infancia á inclusión de tódalas nenas e nenos, visibilizando a necesidade dun mundo máis igualitario que os incorpore, que poña a infancia no centro.
Vivimos na sociedade da prisa en torno ás necesidades dos adultos. Traballo, fogar, lecer orientados a encher as horas cunha programación e espacios nos que as nosas crianzas parecen non ter cabida.
Dentro deste adultocentrismo xeral molestan os choros e as risas, as carreiras e xogos, as preguntas e os seus ritmos, pero tamén a súa soa presenza.
Defendamos os dereitos da infancia
Normas ríxidas que consideran a tódalas crianzas como un grupo homoxéneo, cando non pode ser máis variado. Incluílas na sociedade supón aceptar a súa diversidade e facelas parte da rutina do día a día, téndoas en conta, baixando á súa altura para entender as súas necesidades e desexos, porque só coa inclusión acadaremos a sociedade respectuosa pola que loitamos.
Hai 30 anos nacía a Convención sobre os Dereitos das nenas e nenos coa finalidade de acadar infancias dignas, plenas e felices, sen embargo, ás veces, se facemos caso ás novas e á tendencia destes tempos, parece que as crianzas non son aceptadas e crece a tendencia a afastalas da esfera pública.
Como familias, é labor nosa traballar por facer que as nosas nenas e nenos teñan o espazo que merecen xunto ó resto da sociedade, á que xa pertencen por dereito.
Como Asociación, dende Rede CRIA cremos neste principio. Úneste?
